संवाद दिवाळी अंक २०१३

तुझे आणि माझे

तुझे आणि माझे
नसतेच काही
नुसतीच लाही      फुटफुटे

तसे आपलेसे
कुणीही नसते
प्रारब्ध हसते        पानोपानी

दूरस्थाच्या खुणा
हाकारती नित्य
एकट्याचे सत्य      पोरकेसे

तेव्हा आणि आता
नसतो फरक
स्वर्ग नि नरक     जसे शब्द

तुझे आणि माझे
असलेच काही
कळायाचे नाही      दोघांनाही

(निरूपण)

अभंग

होतात? होऊ दे
कवितांच्या ओळी
           कानांच्या पाळी
तापणार

जातात? जाऊ दे
शब्दही गळून
           थोडेसे जळून
पहावे ना!

येतात? येऊ दे
काळजांचे ठोके
           तेवढेच जागे
स्पर्शसुख

(निरूपण)